ცხოველთა ფერმა

• სათაური: ცხოველთა ფერმა
• ISBN კოდი:
• ავტორი: ჯორჯ ორუელი
• გამომცემელი: iBooks
• გამოცემის თარიღი: 2014
• ენა: ქართული
• გვერდები: 73
• კატეგორია: წიგნები
• ნახვები: 4977
• რეიტინგი: 5.0

 
 
 
1
 
სათავადო ფერმის მეპატრონემ, ბატონმა ჯონსმა, საქათმეები კი დაკეტა, მაგრამ გვარიანად ნასვამი იყო და საძრომების ჩარაზვა დაავიწყდა. ბარბაცით წავიდა ეზოსკენ და ამიტომ მისი ფარნიდან მომავალი შუქის რკალი სხვადასხვა მხარეს თამაშობდა. ჩექმები უკანა კართან მიყარა, სამზრეულოში კასრიდან უკანასკნელი კათხა ლუდი ჩამოისხა და ზემოთ, საწოლისკენ გაემართა, სადაც ქალბატონი ჯონსი უკვე ხვრინავდა.
საძინებელ ოთახში შუქი ჩაქრა თუ არა, ფერმის შენობებში მოძრაობა და ფრთების შრიალი გაჩაღდა. დღის განმავლობაში ხმა დაირხა, ბებერ მაიორს, ჯილდოს მფლობელ საშუალო თეთრი ჯიშის ღორს, წინა ღამით უცნაური სიზმარი უნახავს და სხვა ცხოველებისთვის მისი გაზიარება სურსო. შეთანხმების თანახმად, შეკრებას დიდ სარდაფში მას შემდეგ გამართავდნენ, რაც ბატონი ჯონსისგან საფრთხე აღარ იქნებოდა მოსალოდნელი. ბებერ მაიორს (ჩვეულებრივ, ასე უწოდებდნენ, თუმცა მისი საექსპონატო სახელი „ვილინგდონის მშვენება“ იყო) იმდენად დიდ პატივს სცემდნენ, რომ ყველა თანახმა იყო, ერთი საათი ძილი დაეთმო მის მოსასმენად.
დიდი სარდაფის ერთ ბოლოში, ტრიბუნის მსგავს შემაღლებულ ადგილას, თივისგან გაკეთებულ საწოლზე უკვე დაბრძანებულიყო მაიორი. ზემოდან ფარანი დაჰნათოდა. იგი თორმეტი წლის გახლდათ, მსუქანი იყო, მაგრამ კვლავაც მედიდურად გამოიყურებოდა. დიდსულოვანი და ბრძნული იერი ჰქონდა, იმის მიუხედავად, რომ მისთვის ეშვები არასოდეს არ წაუჭრიათ. თანდათან სხვა ცხოველებმაც დაიწყეს მოსვლა და მოკალათება თავიანთთვის მოსახერხებულად. პირველად სამი ძაღლი მოცუნცულდა: ზანზალაკი, ჯერი და ფხაჭნია, შემდეგ კი ღორები მოვიდნენ. ისინი უშუალოდ ტრიბუნის წინ, თივაზე განთავსდნენ. ქათმები ფანჯრების რაფებზე შემოსხდნენ, მტრედები – ნივნივზე, ცხვრები და ძროხები ღორების უკან დაწვნენ და ცოხნა დაიწყეს. ორი საფორანე ცხენი, მოკრივე და ქლოვერი, ერთად შემოვიდა ნელი სვლით. ისინი დიდი სიფრთხილით დგამდნენ ვეებერთელა, ჯაგრიან ჩლიქებს, რათა თივაში ჩამალული რომელიმე პატარა არსებისთვის არ დაებიჯებინათ....