უპანიშადები

• სათაური: უპანიშადები
• ISBN კოდი:
• ავტორი: ანონიმური
• გამომცემელი: iBooks
• გამოცემის თარიღი: 2018
• ენა: ქართული
• გვერდები: 31
• კატეგორია: წიგნები
• ნახვები: 3071
• რეიტინგი: 3.4

ბრიჰადარანიაკა უპანიშადა;

 

აითარეია უპანიშადა;

 

ქაუშითაქი უპანიშადა;

 

ქენა უპანიშადა;

 

თაითირია უპანიშადა;

 

განყოფილება ბჰრიგუ;

 

ქათჰა უპანიშადა;

 

 

სარჩევი
 
ბრიჰადარანიაკა უპანიშადა
აითარეია უპანიშადა
ქაუშითაქი უპანიშადა
ქენა უპანიშადა
თაითირია უპანიშადა
განყოფილება ბჰრიგუ
ქათჰა უპანიშადა
 
ბრიჰადარანიაკა უპანიშადა
 
განყოფილება მადჰუ
 
თავი პირველი
 
ბრაჰმანა პირველი
 
1. ომ! ჭეშმარიტად! დილისა რიჟრაჟი - თავია სამსხვერპლო ცხენისა, მზე - თვალია მისი, ქარი - მშვინვაა მისი, მისი აფჩენილი ხახა - ცეცხლი ვაიშვანარაა; წელიწადი - ტანია სამსხვერპლო ცხენისა, ცა - ზურგია მისი, ჰაერისა სივრცენი - მუცელია მისი, მიწა - საზარდულია მისი, ქვეყნიერებისა კიდენი - ფერდებია მისი, შუალედი კიდენი - ნეკნებია მისი, წელიწადის დრონი - ასონია მისი, თვენი და ნახევარ-თვენი - შენაწევრებანია მისი, დღენი და ღამენი - კიდურებია მისი, ვარსკვლავნი - ძვლებია მისი, ღრუბლები - ხორცია მისი; საზრდელი მის კუჭში - ქვიშაა. მდინარენი - ძარღვნია მისი, ღვიძლი და ფილტვები - მთებია. ბალახნი და ხენი - თმანია მისი, ამომავალი მზე - წინა ნახევარია მისი, ჩამავალი მზე - უკანა ნახევარია მისი. რაჟამსა დააღრჭენს ხახასა, ელვა ელავს; რაჟამსა შეიძრწოლებს, მეხი გრგვინავს; რაჟამსა ფსამს, წვიმს, ხმანი - ჭიხვინია მისი.
2. ჭეშმარიტად! დღე იშვა ცხენისთვის ვითა ბარძიმი მაჰიმანისა, რასაც წინ უდგამენ ცხენსა; აკვანი მისი - აღმოსავლეთისა ზღვაშია. ღამე იშვა ცხენისთვის ვითა ბარძიმი მაჰიმანისა, რასაცა უკან უდგამენ ცხენსა. აკვანი მისი - დასავლეთისა ზღვაშია. ჭეშმარიტად! ბარძიმნი მაჰიმანისა იშვნენ ცხენის ორთავ მხარეს. რაშად რომ იქმნა, ღმერთებს დააქროლებდა, ჰუნედ რომ იქმნა - განდჰარვებს, მერნად რომ იქმნა - ასურთ, ტაიჭად რომ იქმნა - კაცთ. ზღვა - დამბადებელია მისი, ზღვა - აკვანია მისი.
 
ბრაჰმანა მეორე
 
1. პირველჟამად აქ არა იყო რა. ყოველი მოცული იყო სიკვდილითა ანუ სიყმილითა, უკეთუ სიყმილი - სიკვდილია. მან, სიკვდილად ხმობილმან, ინატრა: „დაე ვიქმნე მე ხორცქმნილი“ - და შეჰქმნა გონება. და დაიძრა იგი დიდებამოსილი, და დიდებამოსილებითა მისითა, იშვა...