ახალგაზრდა ბატონი

• სათაური: ახალგაზრდა ბატონი
• ISBN კოდი:
• ავტორი: ნაცუმე სოსეკი
• გამომცემელი: epsilon
• გამოცემის თარიღი: 2026
• ენა: ქართული
• გვერდები: 88
• კატეგორია: წიგნები
• ნახვები: 18
• რეიტინგი: 5.0

• თავი პირველი
• თავი მეორე
• თავი მესამე
• თავი მეოთხე
• თავი მეხუთე
• თავი მეექვსე
• თავი მეშვიდე
• თავი მერვე
• თავი მეცხრე
• თავი მეათე
• თავი მეთერთმეტე

 სარჩევი
 
თავი პირველი
თავი მეორე
თავი მესამე
თავი მეოთხე
თავი მეხუთე
თავი მეექვსე
თავი მეშვიდე
თავი მერვე
თავი მეცხრე
თავი მეათე
თავი მეთერთმეტე
 
თავი პირველი  
     მემკვიდრეობით მიღებული თავქარიანობის გამო, ბავშვობიდან მოყოლებული, ყოველთვის წაგებულ თამაშს ვთამაშობდი. გრამატიკულ სკოლაში სწავლის დროს, სკოლის შენობის მეორე სართულიდან გადმოხტომის გამო, დაახლოებით ერთი კვირა ლოგინში გავატარე. შეიძლება ზოგმა იკითხოთ, რატომ ჩავიდინე ასეთი დაუფიქრებელი საქციელი. ამისთვის რაიმე განსაკუთრებული მიზეზი არ მქონია. უბრალოდ, ახლად აშენებული სკოლის მეორე სართულიდან ეზოს გადავყურებდი, როდესაც ერთ-ერთმა თანაკლასელმა, ხუმრობით, დამიყვირა; “აბა, შე ტრაბახა, დავნაძლევდები, რომ მაქედან ვერ გადმოხტები! ოჰ, შე ლაჩარო, ჰა-ჰა!” მეც გადავხტი. სკოლის დარაჯს ჩემი სახლში ზურგით წაყვანა მოუხდა, ხოლო როცა მამამ დამინახა, დამცინავად წამოიძახა, “რა კაცი ხარ, მეორე სართულიდან გადმოხტომით ძვლები რომ ამოიგდე!”
     “შემდეგ ჯერზე ისე გადავხტები, რომ არაფერი მომივიდეს,” ვუპასუხე მე.
     ერთხელ ერთმა ნათესავმა ჯიბის დანა მაჩუქა. მეგობრებს ვაჩვენებდი მას და მის ლამაზ პირზე მზის სხივებს ვირეკლავდი, როცა ერთ-ერთმა მათგანმა თქვა, პირები ლამაზად ბრწყინავს, მაგრამ გასაჭრელად ბლაგვი ჩანსო.
      “ბლაგვი? შეხედე, თუ არ ჭრის!” შევეპასუხე მე.
     “მაშინ თითი გაიჭერი,” გამომიწვია მან. და მე ვუპასუხე “თითის გაჭრა არაფერია! აი, ნახე!” და ცერა თითი გვერდულად გავიჭერი. საბედნიეროდ, დანა პატარა იყო და ცერა თითის ძვალიც საკმარისად მაგარი აღმოჩნდა, ამიტომ თითი დღესაც ადგილზე მაქვს, მაგრამ ის ნაიარევი სიკვდილამდე დამრჩება.
     ჩვენი ბაღის აღმოსავლეთ კიდიდან, დაახლოებით ოცი ნაბიჯის დაშორებით, საშუალო ზომის ბოსტანი იყო, რომელიც სამხრეთისკენ ოდნავ დაქანებულ ფერდობზე იყო გაშენებული. მის ცენტრში იდგა წაბლის ხე, რომელიც ჩემთვის სიცოცხლეზე ძვირფასი იყო. წაბლის დამწიფების...