ანტიგონე

• სათაური: ანტიგონე
• ISBN კოდი:
• ავტორი: სოფოკლე
• გამომცემელი: iBooks
• გამოცემის თარიღი: 2017
• ენა: ქართული
• გვერდები: 37
• კატეგორია: წიგნები
• ნახვები: 5724
• რეიტინგი: 5.0

ანტიგონე;

 

რეკომენდებული წიგნები;

 

 

მოქმედნი პირნი:
 
კრეონი - მეფე თებესი;
ევრიდიკე - მისი ცოლი;
ჰემონი - მათი ვაჟი;
ანტიგონე, ისმენე - ოიდიპოს მეფის ასულნი;
ტირესი - ბრმა მისანი;
მაცნე;
დარაჯი;
თებეს უხუცესთა ქორო;
კორიფე;
სასახლის მცველნი, მსახურნი და მხევალნი.
 
პროლოგი
 
ანტიგონე
ნუთუ ვერ ხედავ, საყვარელო დაო ისმენე,
რომ თავის რისხვას, ცოდვათათვის ოიდიპოსის,
სანამ ჩვენ ვცოცხლობთ, არ მოგვაკლებს უფალი ზევსი...
აბა, რა წუხილს იტყვის ენა, რა ავბედობას,
აუგს და ვაგლახს, თუ დამცრობას ჩვენი ღირსების,
რაც ჩვენ შემზარველ ობლობაში არ განგვეცადოს?!
თქვი, ახლა კიდევ რას ამბობენ? მეფე კრეონმა,
კანონი რაღაც დაუდგინა მთელ ქალაქსაო...
იქნებ არც გითხრეს... არ გვიმხელენ იმ საძაგლობას,
რასაც ფარულად ჩვენს ძვირფას ძმას განუმზადებენ.
 
ისმენე
ოჰ, არა, დაო ანტიგონე, ჯერ არაფერიც
არა მსმენია საკეთილო და საწუხარი,
საბედისწერო იმ დღის მერმე, რაც ძმანი ჩვენნი,
ერთად დაეცნენ განგმირულნი ერთურთის ხელით.
მხოლოდ გავიგე, რომ თებედან არგოსელთ ჯარი
განდევნეს წუხელ, სხვა კი, დაო, რა უნდა იყოს,
რაც მოხდა, მასზე საშინელი ან საწუხარი!
 
ანტიგონე
ვიცი, ვერაფერს შეიტყობდი. მეც სასახლიდან
იმიტომ გიხმე, რათა გამცნო ეს საიდუმლო.
 
ისმენე
მაინც რა მოხდა? დაო, რაღაც შენ ისე გზარავს.
 
ანტიგონე
დიახაც მზარავს. გამიგონე, მეფე კრეონმა
ჩვენს ორ ძმათაგან - ერთიღა სცნო დაკრძალვის ღირსად,
ხოლო მეორეს ეს პატივი აჰყარა სრულად.
წესთამებრ მიწას მიაბარა მან ეთეოკლე,
არ დაუკლია ზარ–ზეიმი შესაფერისი,
და ამით ღირს ქმნა, იყოს იგი მკვიდრი ჰადესის...
მაშინ, როდესაც გვამი ბედკრულ პოლინიკესი,
აგრე ბედითად დაღუპულის, ნაბრძანები აქვს, -
არა თუ ვინმემ დაიტიროს, ანუ დაკრძალოს,
არამედ უნდა ღია ცისქვეშ ეგდოს საბრალო...