გველი და შროშანი

• სათაური: გველი და შროშანი
• ISBN კოდი:
• ავტორი: ნიკოს კაზანძაკისი
• გამომცემელი: Philos
• გამოცემის თარიღი: 2017
• ენა: ქართული
• გვერდები: 43
• კატეგორია: წიგნები
• ნახვები: 2771
• რეიტინგი: 4.0

გველი და შროშანი;

 

შენიშვნები;

 

 

I
 
მაისის 2
ისევ სიცხე მაქვს. ჟრუანტელი მივლის მთელს სხეულში, რაღაცა წვალობს და იძაბება ჩემს გონებაში - ზამბარასავით იშლება უეცრად, მერე კი ისევ იხვევა მოუთვინიერებელი აზრი ჩემს შუბლს მიღმა. იფანტება მისი სხეულის სურნელი, ნელ-ნელა კვდება ჩემს ირგვლივ, სულ უფრო ღრმად შემოდის ჩემს გვამში და მითრობს სულს. ვიღაც გასაქცევად მიბიძგებს, რომ დავეწიო, კვლავ დავაბრუნო, რათა კვლავ დამიჯდეს მუხლებზე და კვლავაც მომაგებოს ბაგენი თვისნი.
მისი წითელი ტუჩები ორ დიდ სისხლის წვეთს მაგონებენ, და როცა ვიხრები საკოცნელად, რაღაც ველური ჟინი და პირვანდელი საუკუნეების კაციჭამიათა ინსტინქტი ჩქეფს ჩემს ძარღვებში - ერთიანად ვცახცახებ - ასე მგონია ადამიანის ხორცსა ვწოვ, რომელსაც სისხლი სდის.
 
მაისის 3
დღეს რაღაც უფრო მშვიდად ვარ. ამაღამ არ მოვა. მსურს იგი და მეშინია მისი, უცნაურია, რასაც მის მიმართ განვიცდი. ამ კურთხეული სხეულისათვის, ამ დიდი თვალებისათვის და წითელი, სისხლსავსე ტუჩებისათვის.
ერთ საღამოს დამწუხრებული ვიჯექი ბაღში, ქალაქგარეთ. ვგრძნობდი, რომ ვიღაცას ელოდა ჩემი სული. მოვიხედე და დავინახე: მოცინარი და ლამაზი მოაბიჯებდა ხეებს შორის. ვიღაცის ხელმა მიბიძგა. ო, მახსოვს, ვიღაცის ყოვლადძლიერმა ხელმა მიბიძგა. მივუახლოვდი და ვუთხარი ჩემი სახელი, სახელი ცნობილი ხელოვანისა და ნებართვა ვთხოვე დამეხატა.
შემიყვარდა და შევუყვარდი - მარადიული, მონოტონური, ყოვლად ჰარმონიული სიმღერა!
ახლა კი მინდა მოვიდეს იგი, დიდთვალება და სისხლსავსე ტუჩებით, დამემხოს და ამივსოს ბინა თრობითა და ბედნიერების შიშით. მოვიდეს და გამიშეშოს ყველა ძარღვი, დამიშრიტოს სხეული ნერვული და მომაკვდინებელი ალერსით. და იმ ადგილებში, სადაც მკოცნის, მთელი დღე ტკივილსა ვგრძნობ, როგორც სიდამწვრეს. მის ბაგეთაგან საწამლავისებრი სიტკბოებანი მეღვრებიან ტუჩებზე და მიშეშებენ მთელს აზრსა და მთელს სხეულს.
როცა წავა და სურვილი მიჩნდება დავხატო რაიმე, მხოლოდ უცნაური, ეგზოტიკური ხაზები, შუქთა და ჩრდილთა რაღაც გარყვნილი ერთიანობანი და ფერთა ბოდვანი...