პოემები ტომი 1

• სათაური: პოემები ტომი 1
• ISBN კოდი:
• ავტორი: ვაჟა ფშაველა
• გამომცემელი: iBooks
• გამოცემის თარიღი: 2014
• ენა: ქართული
• გვერდები:
• კატეგორია: წიგნები
• ნახვები: 2644
• რეიტინგი: 5.0

                   სარჩევი
 
დაჩაგრული მესტვირე
მოხუცის ნათქვამი
გიგლია
მონადირე
გოგოთურ და აფშინა
სულა და კურდღელა
ალუდა ქეთელაური
კოპალა
დაჭრილი ვეფხვი
ეთერი
მეჯლისი ლომისა
ანნა-ბულბული
ბახტრიონი
ილო
თეთრო გიორგი, შვილი რა მიყავ?
სტუმარ-მასპინძელი
ხის ბეჭი
ივანე კოტორაშვილის ამბავი
სისხლის ძიება
  
 


დაჩაგრული მესტვირე
 
(ყრმობისდროინდელი პოემა)
 
დავრჩი ობოლი. არავინ მყვანდა,
რომ შევენახე დაობლებული;
ის მამის ქოხიც ჩამომეშალა,
ოჯახიც გახდა გაოხრებული.
მშიერ-ტიტველსა მომინდა რბენა,
რა მამაჩემი ჩავფლე საფლავში.
ნაღველმა გულზე დამიწყო კბენა
და ცრემლი მედგა მუდამ თვალებში.
მუცელს შიმშილი, ფეხებს სიშიშვლე
მუდამ-დღე ჰქონდა დაულეველი.
დაჩაგრულობით ადრე და მალე
დამეკარგა მე სიცოცხლის ძალი.
მწარე სიცოცხლე გამოვიარე,
დაწყლულებული მე დავდიოდი,
მაგრამ ისეთი კაცი ვერ ვპოვე,
ერთს მაინც ვისმე შევბრალებოდი.
მდიდარმა მნახა, ყური არ მიგდო,
შემომიმზირა რაღაც ღმეჭითა;
ჯერ ლუკმა პურიც არვინ მომიგდო
მისუსტებულსა მე შიმშილითა.
ასე ვატარე ჩემი სიცოცხლე,
მინამ ქვეყანას მე გავიცნობდი.
რაკი გავიცან სოფლის სიმუხთლე,
მაშინ გონებით სულ გადავოცდი.
მანამ მე მხოლოდ თავი მიმაჩნდა
მწარე ბედისგან დაჩაგრულათა,
მაგრამ რა ვნახე სხვაც დაჩაგრული,
მე უბედობა ვიცან ბედათა.
ასრეთმა ქვეყნის უსამართლობამ
ჩამიყო თავი მწარე ფიქრებში:
რა დავაშავეთ ჩვენ – ამ საწყლობამ,
რომ ცოცხლებს გვმარხვენ ცივ სამარეში?!
სულ ესე ფიქრი ჩემს გონებიდამ
იყო დღე და ღამ განუშორებლივ,
ამისა გამო ვზარობ სიცოცხლეს
და ვეკიდები კაცის ძეს მტრობლივ.
ჯერეთ ვიფიქრე: თავი მოვიკლა,
მოვრჩე...