რასა და ისტორია

• სათაური: რასა და ისტორია
• ISBN კოდი:
• ავტორი: კლოდ ლევი სტროსი
• გამომცემელი: iBooks
• გამოცემის თარიღი: 2016
• ენა: ქართული
• გვერდები: 39
• კატეგორია: წიგნები
• ნახვები: 2623
• რეიტინგი: 5.0

თავი პირველი. რასა და კულტურა;

 

თავი მეორე. კულტურათა მრავალფეროვნება;

 

თავი მესამე. ეთნოცენტრიზმი;

 

თავი მეოთხე. არქაული კულტურები და პრიმიტიული კულტურები;

 

თავი მეხუთე. პროგრესის იდეა;

 

თავი მეექვსე. სტაციონარული ისტორია და კუმულაციური ისტორია;

 

თავი მეშვიდე. დასავლური ცივილიზაციის ადგილი;

 

თავი მერვე. შემთხვევითობა და ცივილიზაცია;

 

თავი მეცხრე. კულტურათა თანამშრომლობა;

 

თავი მეათე. პროგრესის ორმაგი არსი;

 

 

თავი პირველი
 
რასა და კულტურა
 
მსოფლიო ცივილიზაციაში ადამიანთა რასების მიერ შეტანილი წვლილის თაობაზე საუბარმა შეიძლება გაოცება გამოიწვიოს ბროშურების იმ კოლექციაში, რომელიც რასისტული წინასწარ ჩამოყალიბებული შეხედულების წინააღმდეგ ბრძოლისთვისაა გამიზნული. სწორი არ იქნებოდა, ამდენი ტალანტი და ძალისხმევა გამოგვეყენებინა იმის დასამტკიცებლად, რომ მეცნიერებას მოცემულ ეტაპზე არ შეუძლია დაამტკიცოს ერთი რომელიმე რასის ინტელექტუალური უპირატესობა ან ჩამორჩენილობა მეორე რასასთან შედარებით, თუ ეს მხოლოდ იმისთვის გაკეთდება, რომ რასის ცნებას ფარულად აღვუდგინოთ მისი მდგრადი ხასიათი იმის მოჩვენებითი მტკიცებით, რომ დიდმა ეთნიკურმა ჯგუფებმა, რომლებიც კაცობრიობას შეადგენენ, სპეციფიკური წვლილი შეიტანეს საერთო მემკვიდრეობაში.
მაგრამ წამოწყება, რომლის საბოლოო შედეგი რასისტული დოქტრინის უკუღმა ფორმულირება იქნებოდა, არ არის ჩვენი მიზანი. როდესაც ცდილობენ, ბიოლოგიური რასები დაახასიათონ განსაკუთრებული ფსიქოლოგიური თვისებებით, მეცნიერულ ჭეშმარიტებას ერთნაირად შორდება, როგორც დადებითი, ასევე უარყოფითი დახასიათება. არ უნდა დაგვავიწყდეს, რომ გობინო (Gobineau), რომლის ისტორია რასისტული თეორიების მამა გახდა, „ადამიანთა რასების უთანასწორობას“ მოიაზრებდა არა რაოდენობრივად, არამედ ხარისხობრივად: მისთვის დიდი პრიმიტიული რასები, რომლებიც შეადგენდნენ კაცობრიობას მის საწყის ეტაპზე – თეთრი, ყვითელი, შავი, – მათი განსაკუთრებული ნიჭით უფრო ნაირგვაროვანნი იყვნენ, ვიდრე უთანასწორონი აბსოლუტური ღირებულების თვალსაზრისით. მისთვის გადაგვარების ნაკლი დაკავშირებული იყო უფრო სისხლის აღრევის ფენომენთან, ვიდრე თითოეული რასის მიერ ყველასთვის საერთო ღირებულებების იერარქიაში დაკავებულ პოზიციასთან. მას დარტყმა უნდა მიეყენებინა მთელი კაცობრიობისათვის, განურჩევლად რასისა, რომელსაც მისჯილი ჰქონდა სულ უფრო და უფრო გახშირებული სისხლის აღრევა. მაგრამ ანთროპოლოგიის მთავარი ცოდვა რასის სუფთა ბიოლოგიურ ცნებისა (თუ დავუშვებთ, სხვათა შორის,...