სარკის მიღმა

• სათაური: სარკის მიღმა
• ISBN კოდი:
• ავტორი: ანა რეიმი
• გამომცემელი: Anano Razmadze
• გამოცემის თარიღი: 2026
• ენა: ქართული
• გვერდები:
• კატეგორია: წიგნები
• ნახვები: 5
• რეიტინგი: 5.0

სარკის
მიღმა









ანა რეიმი









თავი I

პროლოგი



სახლის შემოსასვლელი დარბაზის შუაგულში, ბროლის ჭაღის ქვეშ, თეთრი მარმარილო უკიდეგანო ტბასავით იყო გაშლილი. იატაკი ისე პრიალებდა, რომ მასზე გამვლელის ანარეკლი ფეხქვეშ მკვეთრად მოსჩანდა. დარბაზის ორივე მხრიდან აჭიმული მარმარილოს საფეხურები, ორი ტალღასავით, ზედა სართულზე, ერწყმოდა ერთმანეთს და პატარა აივანს ჰქმნიდა. ჭერიდან ჩამოშვებული უზარმაზარი ბროლის ჭაღი ცივ და კაშკაშა შუქს აფრქვევდა. ყოველი კრისტალი ათასობით ბასრ ნაპერწკლად იშლებოდა თეთრი იატაკზე და მთელ სივრცეს ანათებდა.
ჰოლში გაბატონებული სიჩუმე სწრაფი ნაბიჯების ექომ დაარღვია და ჭერამდე აიტანა. მარჯვენა კიბეზე, ერთი ამოსუნთქვით ჩამოირბინა მაღალმა და შავგვრემანმა კაცმა. ოცდაცამეტივე საფეხური ისე მოიტოვა უკან, რომ ერთხელაც არ შეჩერებულა. მამაკაცს თეთრი პერანგის საყელო შეხსნოდა. ჰალსტუხი, რომელიც დილით უნაკლოდ ჰქონდა შეკრული, ახლა კისერზე მოშვებული ეკიდა, რაც გრძელ, საქმიან ღამეზე მიანიშნებდა. სწორი ცხვირი, მჭიდროდ მოკუმული თხელი ტუჩები და შეკრული წარბები, მკაცრ და ცივ გამომეტყველებას სძენდა, თუმცა მარტივი შესამჩნევი იყო რომ ამ ცივი ნიღბის მიღმა, შიშის დამალვას ცდილობდა.
მამაკაცმა მთელი ძალით სტაცა ხელი ცხრა წლის ბავშვს, რომელიც იქვე პირველ საფეხურთან იდგა და მკერდამდე ძლივს სწვდებოდა. პატარა იმ გიგანტური სარკისკენ გააქანა, რომელიც შემოსასვლელი კარის პირისპირ, ორ კიბეს შორის იყო აღმართული. შემდეგ საიდუმლო ღილაკს დააჭირა თითი, რომელიც სარკის მოოქროვილი ჩარჩოს ურთულეს ორნამენტებში იყო ჩამალული და იმდენად შეუმჩნეველი იყო, რომ შეუიარაღებელი თვალი ვერასოდეს მიაგნებდა. სარკე მძიმე მექანიკური კარივით, ხმაურის გარეშე გაიღო და მამაკაცმა, ელვის სისწრაფით, შეაგდო ბავშვი ბნელ სივრცეში. შეშინებულ პატარას ფეხები აერია და ბეტონის იატაკზე პირდაპირ მუცლით დაემხო, თუმცა მაშინვე წამოხტა და ის ის იყო კარის ვიწრო ნაპრალში უნდა გამძვრალიყო, როცა მძიმე კარი დაუნდობლად მიუხურეს ცხვირწინ. ბავშვი ცივ მინას მიემხო და მამამისისთვის...