უტოპიზმის ერესი

• სათაური: უტოპიზმის ერესი
• ISBN კოდი:
• ავტორი: სიმონ ფრანკი
• გამომცემელი: iBooks
• გამოცემის თარიღი: 2017
• ენა: ქართული
• გვერდები: 18
• კატეგორია: წიგნები
• ნახვები: 1711
• რეიტინგი: 4.0

საავტორო უფლება;

 

უტოპიზმის ერესი;

 

მსგავსი წიგნები;

 

 

ცნობილი ანტიკური შეხედულების თანახმად ადამიანის ყოველგვარი სიამაყე თუ ქედმაღლობა (hybris), ყოველი მისი კადნიერი თავნებობა, რომლის ძალითაც იგი საგანთა ბუნებრივ რიგს არღვევს და მისთვის შეუსაბამო ადგილსა და მნიშვნელობას ეპოტინება, საბედისწეროდ ისჯება. სასჯელი იმანენტურადაა განსაზღვრული თვით დანაშაულებრივი განზრახვის არსით. რადგან რაც გინდა ბუნებრივი იყოს ადამიანის სწრაფვა ბედნიერების, თავისუფლებისა და ძლიერებისაკენ, როგორც კი ამგვარი სწრაფვანი გადასცდებიან გარკვეულ საზღვრებს, უღალატებენ ზომიერებას, არად ჩააგდებენ იმ გარემოებას, რომ ადამიანის შესაძლებლობათა შეზღუდულობა ღვთაებრივ-კოსმოსური კანონებითაა დადგენილი. ისინი იღებენ სიგიჟის სახეს და გარდუვალობით მიაქანებენ ადამიანს დასაღუპავად.
ეს ანტიკური რწმენა მიეკუთვნება უდიდეს, მარადიულ ჭეშმარიტებათა რიცხვს, რაც კაცობრიობას ბერძნულმა რელიგიურ-ზნეობრივმა აზროვნებამ უანდერძა. მას განამტკიცებს უბრალო ცხოვრებისეული გამოცდილება, ხოლო ღრმად ასაბუთებს ქრისტიანული რელიგიური მსოფლგაგება, ჩვენს მიერ გადატანილი მსოფლიო ომი, სისასტიკისა და ტანჯვა-წამების ხარისხით ადამიანურ წარმოსახვას რომ სცილდება, მოვლენათა განვითარების მიხედვით არის კლასიკური ნიმუში ტრაგედიისა, რომელიც ამ ანტიკურსა და მარადიულ მოტივზე გათამაშდა. გათამაშდა, ან უფრო სწორად კიდევ თამაშდება, - რადგან ბოლო აქტი ანუ ეპილოგი ჯერ არ დასრულებულა, - არსმენილი, ნაღდად მსოფლიო მასშტაბის ტრაგედია. თუმცა კი მისი წამომწყებნი და პროტაგონისტები არც ისე ბევრი გიჟი და ავაზაკია, მაგრამ თანამონაწილეთა და მსხვერპლთა რიცხვი მილიონებია. ხოლო შეძრულია თითქმის მთელი კაცობრიობა.
ეს მსოფლიო ტრაგედია ჭკუის სასწავლებელი კია, მაგრამ მისი საზრისი იმდენად მარტივი და გამჭვირვალეა, რომ აღარ საჭიროებს ჩაღრმავებულ განსჯას. უსაზღვრო ძალაუფლების ბატონობის დემონიზმი, რომელიც თავის განზრახვებსა და საშუალებებს ელემენტარულ ზნეობრივ კანონებს არ უფარდებდა, გამომჟღავნდა როგორც სიშლეგე, არანაკლებ დამღუპველი დამნაშავეთათვის, ვიდრე მისი მსხვერპლისათვის....