იონი

• სათაური: იონი
• ISBN კოდი:
• ავტორი: პლატონი
• გამომცემელი: Philos
• გამოცემის თარიღი: 2016
• ენა: ქართული
• გვერდები: 17
• კატეგორია: წიგნები
• ნახვები: 2678
• რეიტინგი: 5.0

იონი;

 

 

სოკრატე
იონი
 
სოკრატე. სალამი იონს! საიდან გვეწვიე ამჯერად? შენი მშობლიური ეფესიდან[1] ხომ არა?
იონი. არა, სოკრატე, ეფესიდან კი არა, ეპიდავრიდან[2], ასკლეპიოსის დღესაწაულზე გახლდით.
სოკრატე. განა ეპიდავრელები რაფსოდთა შეჯიბრს მართავენ ამ ღვთაების პატივსაცემად?
იონი. რა თქმა უნდა; იქ არა მარტო რაფსოდები, არამედ სხვა მუსიკური ხელოვნების მიმდევრებიც ეჯიბრებიან ერთმანეთს.
სოკრატე. მერედა, ჩვენც ვასპარეზობდით? ანდა როგორ იასპარეზე?
იონი. პირველი ჯილდო ჩვენ დაგვრჩა, სოკრატე.
სოკრატე. მომილოცავს! ვინძლო პანათენურ დღესასწაულებზედაც[3] გაიმარჯვო!
იონი. თუ ღმერთმა ინება, გავიმარჯვებ, სოკრატე.
სოკრატე. რომ იცოდე, იონ, როგორ შურით ვუყურებ ხოლმე თქვენს ხელოვნებას, რომელიც გავალებთ დღემუდამ მორთულ-მოკაზმულნი იყოთ და, რაც შეიძლება მშვენიერნი ჩანდეთ. გარდა ამისა, თქვენთვის აუცილებელია გამუდმებით ჩაჰკირკიტებდეთ ბევრ დიდებულ პოეტს, უპირველეს ყოვლისა კი ჰომეროსს - უკეთესს და უღვთაებრივესს პოეტთა შორის, და, ამასთან. არა მარტო მისი ლექსის მომხიბვლელობის, არამედ მისის აზრის წვდომასაც ცდილობდეთ. შესაშური ხვედრია სწორედ! რადგან შეუძლებელია, რაფსოდი იყო და არ გესმოდეს, რისი თქმა სურს პოეტს. და მართლაც, რაფსოდი პოეტის აზრს უნდა უმარტავდეს მსმენელთ[4], ხოლო ამას ვერ შეძლებს ის, ვისაც არ ესმის, რას ამბობს პოეტი. მოდი და ნუ შეგშურდება ეს!
იონი. მართალს ბრძანებ, სოკრატე. უნდა ვაღიარო, რომ ჩემთვის ძნელი იყო დავუფლებოდი რაფსოდული ხელოვნების სწორედ ამ მხარეს, თუმცა ჩემის აზრით, ყველაზე უკეთ მაინც მე განვმარტავ ჰომეროსს, ასე რომ, არც მეტროდორე ლამპსაკელს, არც სტესიმბროტე თასოსელს, არც გლავკონს[5] და არც სხვა ვინმეს არასოდეს არ გამოუთქვამს იმდენი საყურადღებო და სარწმუნო აზრი ჰომეროსის შესახებ, რამდენიც მე.
სოკრატე. მშვენივრად მსჯელობ, იონ. ალბათ არ დაიზარებ და მეც გამანდობ შენს აზრებს.
იონი. რატომაც არა; ღმერთმანი, ღირს იმის მოსმენა, თუ როგორ ვამკობ და ვრთავ ჰომეროსს. ამიტომ, ვფიქრობ, დიახაც ვიმსახურებ...