მახასიათებლები
- სათაური: ოდესღაც რბილ ბალახზე დავრბოდი თურმე
- ISBN კოდი: 978-9941-496-01-1
- ავტორი: კაროლინა შუთი
- გამომცემელი: კლიო
- გამოცემის თარიღი: 2021
- ენა: ქართული
- გვერდები: 60
- კატეგორია: წიგნები
- ნახვები: 896
- რეიტინგი: 5.0
სარჩევი
- I ბაბუშკა
- II ბუმბულის გამოქვაბული
- III თბილი ჟოლოები
- IV სავარცხლის ასი ჩამოსმა
- V ამჟავებული რძე
- VI ოთახი ნომერი სამი
- VII ფრაუ ჰოლე
გადაფურცვლა
I
ბაბუშკა
„უბრალოდ დაიწყე, – თქვა მაიამ,
– ამდენი პირველი წინადადებაა“.
„ამას ბაბუშკა კი არა, მატრიოშკა ჰქვია“, – მითხრა ბებიდამ, მამაჩემის ერთადერთმა დეიდამ, რომელმაც რუსული საერთოდ არ იცოდა. შეიძლება მართალიც იყო, მაგრამ მაინც არ დავუჯერე. ჩემს ხის თოჯინას უკვე კარგა ხანია ასე ვეძახდი, ფრთხილად ვანჯღრევდი, ნაწილებად ვშლიდი, მერე ისევ ვაწყობდი, სულ ბოლო, ციცქნა ფიგურას გულდასმით ვათვალიერებდი, ესეც ხომ არ იღება რამე საიდუმლო მექანიზმით, როგორც დანარჩენები-მეთქი, რადგან ვერაფრით ვიჯერებდი, რომ ბოლო იყო.
ღამღამობით ხშირად თვალდაჭყეტილი ვიწექი ლოგინში და ოთახს ვათვალიერებდი, თან დიდ ბაბუშკას ვუყვებოდი, როგორია გარედან ჩვენი სახლი და ბაღი, განში გაწელილი სოფელი, ვუყვებოდი, რომ ჩრდილი ნახევარ წელზე მეტხანს ადგას სახლების უმეტესობას. ვუყვებოდი ტყეებით დაფარულ ხეობის ფერდობებზე, ხეობის თავზე გადაჭიმულ ღამეულ ცაზე. მაშინებდა ის ფაქტი, რომ არავის შეეძლო ეთქვა, რა იყო ცის მიღმა. მაგრამ იქნებ პასუხის მისაღებად კითხვის სწორად დასმა იყო საჭირო. ბაბუშკა თავისი დიდი თვალებით მიცქერდა. გავხსნიდი, ყველაზე პატარა თოჯინას ამოვიღებდი, ნაზად დავიწვენდი ხელზე, ვარწევდი და მიკვირდა, როგორ დიდივით გამოიყურებოდა.
შენი ბაბუშკა დაიკარგაო, მარწმუნებდნენ, მაგრამ ვიცოდი, შეუძლებელი იყო. ის არასოდეს გამქონდა გარეთ. იქნებ დეიდაჩემმა გადაწყვიტა, რომ უკვე მეტისმეტად დიდი ვიყავი თოჯინებისთვის და სხვენზე გადამალა, ან სულაც გადააგდო. იქნებ იმ ბუტბუტმა შეაშფოთა, ყოველ საღამოს რომ ესმოდა ჩემი ოთახიდან. არ ვიცი, არც არასდროს მიკითხავს.
მარეკს მოვუყევი ბაბუშკას შესახებ. მან თმა ყურზე გადამიწია და შუბლზე მაკოცა.
– Moje kochanie[1], – ჩურჩული თქვა. ამ სიტყვების მნიშვნელობა ვიცოდი, მიუხედავად იმისა, რომ პოლონური არ მისწავლია და ადრეულ ბავშვობაში ნასწავლი ბელორუსულიც ბაბუშკასავით სადღაც გაქრა.
მარეკს ხის პატარა ქოხი ჰქონდა ველური ბაღით. მოხუც ვალტერს სთხოვა მისი მოვლა და ფულიც...
კაროლინა შუთი
კაროლინა შუთი დაიბადა 1976 წელს ავსტრიაში, ქალაქ ინსბრუკში, სადაც დღემდე ცხოვრობს. დაამთავრა გერმანული ფილოლოგიის, ასევე ანგლისტიკისა და ამერიკათმცოდნეობის ფაკულტეტები. აქვს უმაღლესი მუსიკალური განათლება. სადოქტორო ნაშრომი ელიას კანეტის შესახებ დაიცვა. სამწერლო მოღვაწეობის პარალელურად ხელმძღვანელობს ლიტერატურულ ღონისძიებებსა და ინტერდისციპლინარულ პროექტებს, მუშაობს ნაფიც მსაჯულად, ატარებს ლექციებს.
